Recent Posts

Breaking News

1 patay, 1 angol sa sunog sa Lahug

USA ang patay ug usa angol sa pagkasunog sa pito ka mga balay sa sityo Banika, Barangay Lahug, Dakbayan sa Sugbo sa alas 11:35 sa Miyerkules sa gabii, Abril 8, 2020.

Ang namatay giila ni FO2 Fulbert Navarro nga si Rosita Ponce, 74, tag-iya sa balay diin magsugod ang kayo.

Ang naangol giilang si Patricio Bacule, silingan.

Matod ni Navarro sa interbyu sa Superbalita Cebu nga suma sa sulti sa mga kabanay ni Ponce, nagpabukal kini og tubig.

Giingon nga di na kaayo maayo og pangisip si Ponce tungod sa pangedaron.

“Giango-ango na man gud kuno ni. Basin nalimtan pagpawong ang kayo sa abuhan,” sulti ni Navarro.

Matod niya nga wa na makagawas si Ponce sa balay nga gama sa light materials.

Si Bacule nakaangkon og mga paso.

Gibana-bana ni Navarro ang danyos sa sunog nga naa sa P240,000. (BBT)

Source: Sun.Star Superbalita (https://www.sunstar.com.ph/article/1851998/Superbalita-Cebu/Balita/1-patay-1-angol-sa-sunog-sa-Lahug?ref=rss&format=simple&link=link)

No comments