Recent Posts

Breaking News

Salosalo sa pagkaon likayan una


ADUNA pahimangno si Lapu-Lapu City Mayor Junard Chan sa mga trabahante sa mga establisemento nga mangaon panahon sa ilang trabaho.

Kini human nga base sa pakisusi sa kagamhanan kadaghanan sa mga bag-ong nagpositibo sa coronavirus disease (Covid-19) sa dakbayan mga trabahante sa mga establisemento.

Tungod niini gipahibawo ni Chan sa iyang Facebook page nga usa sa ilang nakita nga posibleng rason sa pagtakodtakod mao ang pag banos-banos sa mga kahimanan panahon sa pagkaon dili lang sa gawas kung dili sa tagsa-tagsa ka panimalay mismo.

Kini sama sa kutsara, tinidor, plato ug uban pa.

Sa panahon nga mokaon ang usa ka tawo kinahanglan na mohubo siya sa iyang maskara nga mahimo na usab siyang vulnerable sa virus.

Sumala ni Chan nga base sa World Health Organization WHO ang lamesa sa kan-anan maoy nalakip sa top 10 sa labing common nga gamit sa tawo matag adlaw nga mao usay pinakadali nga pundohan sa virus.

Nunot niini gipahimangnoan karon ni Chan ang mga Oponganon nga sa pagkakaron likayan una ang pagsalo sa usa ka lamesa o ba kaha pagkaon hilabi na sa gawas sa panimalay aron kalikayan ang pagtakod-takod sa virus.

Ug kadtong mga dili kalikayan nga mogawas gumikan sa trabaho mas maayong dili lang usab una sila makigsalo og pagkaon ug lamesa sa ilang mga pamilya.

“Sa panahon karon kinahanglan kita nga makat-on base sa findings sa milabyang mga kaso para dili mapun-an pa ang mga infected inviduals sa ating syudad. Mao lang kini ang nag-inusarang paagi nga makatabang kita nga dili na mosaka ang kaso sa maong sakit ug maprotektahan pud nato atong pamilya,” tipik sa post sa Facebook ni Chan. (GCM)


Source: Sun.Star Superbalita (https://www.sunstar.com.ph/article/1861296/Superbalita-Cebu/Balita/Salosalo-sa-pagkaon-likayan-una?ref=rss&format=simple&link=link)

No comments