Recent Posts

Breaking News

Ordinansahon giduso; P5K sa di mag face mask


KON di ka magsul-ob og face mask sa gawas sa balay sa Dakbayan sa Mandaue, dunay bug-at nga multang maghuwat kanimo.

Kana kon hingpit nang mapalabang sa Konseho sa Dakbayan ang ordinansahon nga gipangamahanan ni Mandaue City Councilor Nerissa Soon-Ruiz, tsirman sa committee on health.

Ang ordinansahon giuyonan sa konseho sa unang pagbasa.

Sa ordinansa, una pa lang nimong paglapas makamulta ka na og P1,000. Mas bug-at sa ikaduha kay P3,000. Sa ikatulong paglapas, P5,000 na.

Ang ordinansahon gitumong aron pahugtan ang kampanya sa pagsul-ob og face mask, labi na sa pampublikong lugar aron malikayan ang pagkatap sa coronavirus disease (Covid-19).

Sigon ni Ruiz nga aduna nay gipasar nga susamang ordinansa niadtong Abril nga aduna lay penalty nga P1,000 sa third offense samtang ang first ug second offense badlungon lang.

Apan dugang ni Ruiz nga di kini ingon ana ka-epektibo tungod kay aduna pa gihapoy mga lumulupyo sa Mandaue nga di mag mask magsuroysuroy.

Hinungdan nga giapas niya ang iyang giduso nga ordinansa nga adunay penalty nga sa first offense nga P1,000.

AYAW SA SUWANG

Sigon ni Ruiz nga ang pamultahon kadtong mga wa nag-mask ug kadtong mga adunay mask, apan gibutang lang sa suwang.

Ang mga barangay tanod ug kapulisan gitahasan sa pag-implementar sa ordinansa sa panahon nga maduso na kini.

Sigon ni Ruiz nga giawhag sab ang publiko nga kuhaan og litrato ang mga tawo nga nakalapas sa ordinansa ug i-report kini sa awtoridad.

Ang ordinansa giduso pa sa committee on laws.

Nagpaabot pa si Ruiz kon adunay mga rekomendasyon ang maong committee.

Moagi pa sab ang maong ordinansahon sa ikaduha ug katapusang pagbasa, una pa iduso ngadto ni Mandaue City Mayor Jonas Cortes aron lagdaaan sa di pa ipatuman. (KFD)


Source: Sun.Star Superbalita (https://www.sunstar.com.ph/article/1861443/Superbalita-Cebu/Balita/Ordinansahon-giduso-P5K-sa-di-mag-face-mask?ref=rss&format=simple&link=link)

No comments