Recent Posts

Breaking News

Naaborido sa quarantine, mipatay


GITUOHAN nga naaborido pag-ayo ang 24 anyos nga suspek hinungdan nga iyang gipatay anf iyang mag-apohan ug mitigbas pa sa silingan ug uyoan.

Ang insidente nahitabo Sabado sa gabii, Hunyo 20, didto sa Purok-1B, Barangay Del Monte, Samal District, Island Garden City of Samal (Igacos), Davao del Norte.

BASAHA: Mag-apohan gipanigbas sa apo, patay

Si Police Master Sergeant Hellie S. Jovellano, imbestigador sa Igacos Police Station, nag-ila sa suspek nga si Arjay Lopez Gevana, alyas Adi, 24 anyos, mag-uuma ug molupyo sa dapit.

"Subay sa atong mga nahinabi nga mga silingan ug bisan sa kabanay niini, allegedly naaborido na ang suspek labi na kay naa siya sa pag-quarantine," sulti ni Jovellano.

Nasayran nga gikan sa Davao City ang suspek ug giingong nakabarkada kini ug nalambigit sa ilegal nga droga.

"Nagtrabaho ni sa Davao, nakabarkada og bugoy, nalambigit sila sa droga, mao ning usa sab nga gitan-aw sa kabanay nga hinungdan sa pagkaliso sa iyang maayong pangisip," ingon ni Jovellano kinsa miasoy sa gisaysay sa kabanay ngadto sa kapulisan.

Dugang nasayran nga produkto ang suspek sa broken family diin ang mga apohan na niini ang nagpadako samtang naa sa abroad ang inahan.

Kahinumdoman, giayog tigbas gamit ang lagaraw sa suspek ang iyang mga apohan nga sila Alejandro Gevana, 87, ug Leona Lopez Gevana, 84.

Naa sab sa pikas kuwarto, nagkadugo ug nagpakitabang ang uyoan niini nga si Mario Lopez Gevana human giapil sab og tigbas lakip ang silingan nga si Marlon B. Rafael, kinsa sa maong takna miadto sa balay sa mga biktima gumikan sa kasamok.

Sa kasamtangan, gibalhog na sa selda sa Igacos police station ang suspek samtang gihuwat ang resulta sa psychological examinations aron maoy basehan sa korte kung mapasakaan ba kini og kaso luyo sa kahimtang niini sa panghunahuna.


Source: Sun.Star Superbalita (https://www.sunstar.com.ph/article/1861113/Superbalita-Davao/Balita/Naaborido-sa-quarantine-mipatay?ref=rss&format=simple&link=link)

No comments