Recent Posts

Breaking News

5 ka pulis sa Brgy. Opao positibo sa Covid-19, station gi-lockdown


ADUNAY laing lima ka pulis ug dinakpan nga nagpositibo sa coronavirus disease (Covid-2019) sa Opao Police Station sa Dakbayan sa Mandaue hinungdan nga gipaubos gihapon ang estasyon sa lockdown.

Nagsugod ang lockdown sa estasyon niadtong Hunyo 11, 2020 human usa sa ilang dinakpan nagpositibo sa Covid-19 ug sa kinatibuk-an unom nng nagpositibo sa maong estasyon.

Matod ni PMaj. Mercy Villaro, ang tigpamaba sa Mandaue City Police Office (MCPO), nga sa lima nga bag-ong napuno sa nagpositibo tulo niini mga pulis ug ang duha mga dinakpan.

Ang tulo ka mga pulis ang mga unang nagpositibo sa Covid-19 nga mga kawani sa MCPO.

Usa sa tulo ka mga pulis ang desk officer sa Opao Police Station ug ang laing duha kawani sa maong estasyon.

Sukad gi-isolate ang tulo ka pulis sa Mandaue City Central Isolation Unit (MCCIU) wala kini makasinati og mga simtomas.

Ang una nga dinakpan nga nagpositibo sa maong estasyon human kini nakapyansa gibalhin na kini sa MCCIU.

Ang nadugang nga duha ka dinakpan nahatod na sa pasilidad sa Bureau of Jail Management and Penology (BJMP) human mugawas ang ilang commitment.

Nagpadayon gihapon ang pag-swab sa mga kawani sa estasyon ug wala pa mahibaw-i kung kanus-a kutob ang paglockdown sa Opao Police Station.

Tungod naka-lockdown ang Opao Police Station, muabag ang ubang mga estasyon kung adunay alarma nga sakop sa hurisdiksyon sa estasyon.

“Mao nalang na karon atong mabuhat ron kun dili ang pagtinabangay kung unsay ga problema,” sigon ni Villaro.

Sa laing bahin, Ang MCPO mipagawas ug bag-ong memo alang sa mga kapulisan nga dili una pabisitahan ang MCPO headquarters.

Kung aduna kini tuyo sa headquarters mamahimo lang sila nga mupadangat sa ilang tuyo pinaagi sa email, Viber, chat ug uban pa nga komunikasyon.

Sigon ni Villaro nga kini usa ka pamaahi aron maprotektahan ang mga kawani nga anaa sa headquarters kansang ang planning ug logistics anaa dinhi nga kinahanglan panalipdan. (KFD)


Source: Sun.Star Superbalita (https://www.sunstar.com.ph/article/1861068/Superbalita-Cebu/Balita/5-ka-pulis-sa-Brgy-Opao-positibo-sa-Covid-19-station-gi-lockdown?ref=rss&format=simple&link=link)

No comments