Recent Posts

Breaking News

2 nag-ayo og sakyanan naligsan, patay


DUHA ka mga tawo nangamatay atol sa usa ka vehicular accident mga alas 2:45 sa hapon, Hunyo 30, 2020, sa national highway sa Barangay Camboang, lungsod sa Dumanjug, Sugbo.

Mga biktima nga nangamatay diha-diha giilang sila si Rogelio Gepatalagan, 59, minyo, drayber, taga Tanke, Talisay City; ug si Gino Bandico Palma, 35, mekaniko taga Tubod, Toledo City.

Ang suspek nga nagmaneho sa trak ug gitanggong na sa Dumanjug Police Station mao si Oliver Maurin, 25, taga Barangay Tutay, Pinamungahan, Cebu.

Si Police Major Ardeoleto Cabagnot, hepe sa Dumanjug Police, niingon nga base sa ilang imbestigasyon, si Maurin maoy nipuli sa pagmaneho sa trak nga nagkarga og mga liquefied petroleum gas (LPG) tanks gikan sa lungsod sa ronda kay giduka si Jesine Ogahayon, 27, drayber.

Pag-abot sa Camboang, matod ni Cabagnot, dunay gikasugat nga multicab si Maurin hinungdan nga naratol.

Samtang sila si Gepatalagan ug Palma diha ilawom sa dumptruck nga nag-park sa usa ka lane sa karsada kay nag-ayo sa sakyanan.

Naigo ang kilid sa dumptruck sa trak nga gimaneho ni Maurin dayon naligsan sila si Gepatalagan ug Palma, kinsang katunga sa mga lawas diha sa karsada.

Ang duha nangamatay diha-diha.

Nasuta sa kapulisan nga si Maurin naghupot lang og student’s permit ug nagkat-on pa og drive.

Si Maurin nga gibilanggo mag-atubang og reckless imprudence resulting to double homicide. (BBT)


Source: Sun.Star Superbalita (https://www.sunstar.com.ph/article/1862011/Superbalita-Cebu/Balita/2-nag-ayo-og-sakyanan-naligsan-patay?ref=rss&format=simple&link=link)

No comments