Recent Posts

Breaking News

2 ka lungsod taas og kaso sa Covid


ANG mga lungsod sa Minglanilla ug Consolacion maoy ningtala og labing daghan sa mga kaso sa Covid-19 gawas sa Talisay City sa Lalawigan sa Sugbo, ug sa tri-cities nga Cebu, Mandaue ug Lapu-Lapu, matod sa records sa Department of Health (DOH) 7.

Sila si Consolacion Mayor Joannes Alegrado ug Minglanilla Mayor Elanito Peña pulos nagtuo nga ang hinungdan niini mao nga sagad sa ilang mga lumolupyo nanagtrabaho sa mga kompaniya ug industriya nga naa sa tulo ka mga siyudad.

Sa Minglanilla lang, duna silay 1,100 ka mga trabahante sa Dakbayan sa Sugbo, ug 41 ka frontliners.

Si Alegado, usa ka doktor, niingon nga ilang napugngan ang pagdaghan sa mga kaso sa coronavirus disease gikan sa Marso hangtod sa Mayo. Apan, nakabantay sila sa pagsaka sa mga kaso dihang ang Siyudad sa Sugbo ni-downgrade ngadto sa general community quarantine (GCQ) gikan sa enhanced sa Hunyo 1 ngadto sa 15.

Ang Siyudad sa Sugbo maoy dunay labing taas og mga kaso sa Central Visayas. Bisan sa community quarantine status, daghan sa essential workers ang exempted sa border controls.

“Tungod tingali sa pag-lift sa restrictions, mao na to nga ubay-ubay na ang mga tawo nga nanarbaho sa Cebu City,”matod ni Alegado.

Gawas pa niini, iyang gitumbok nga laing hinungdan mao ang ilang agresibong contact tracing, swab testing, ug nahimutangan sa Consolacion nga duol ra sa Mandaue ug Dakbayan sa Sugbo.

Dunay mga barangay nga nag-utlan tali sa Siyudad sa Sugbo.

“Geographically, kita g’yod dayon ang LGU (local government unit) nga next to Mandaue City and Cebu City. I think it would follow nga ang pag spread o ang accessibility sa mga tawo to the cities is there,” siya nidugang.

Niini, siya niingon nga ang risgo sa Covid-19 taas kaayo itandi sa ubang mga lungsod sa norte sa Lalawigan sa Sugbo.

Laing mga dapit sa lalawigan nga dunay mga kaso sa Covid-19 mao ang Danao City, San Fernando, Liloan, Moalboal, Dakbayan sa Naga, Pinamungajan, Daanbantayan ug Bogo City.

Sa Biyernes, Hunyo 26. 2020 sa alas 5 sa hapon, ang kinatibuk-ang gidaghanon sa mga kaso nga natala sa Talisay City ug mga lungsod sa Minglanilla ug Consolacion nilangkob sa katunga sa gidaghanon sa mga kaso nga natala sa tibuok Lalawigan sa Sugbo nga dunay 879 ka mga kaso.

Sa Biyernes, ang Talisay City dunay 221 ka mga kaso. Ning mao nga gidaghanon, 97 ang aktibo; 89 ang naulian samtang 35 ang nangamatay.

Gisundan kini sa lungsod sa Minglanilla nga dunay 134 ka kinatibuk-ang mga kaso; 74 ang aktibong kaso, 56 naulian ug upat ang nangamatay.

Ikatulo ang Consolacion nga dunay 86; 63 aktibong kaso, 16 naulian ug pito ang nangamatay. Matod ni Alegado nga mabantayan ang clustering sa mga kaso sa ilang mga barangay duol sa Poblacion. Kini naa sa mga barangay Nangka, Casili ug Tayud, nga iyang giingon nga grabe kadaghan og mga nagpuyo.

HEALTH CARE WORKERS

Si Peña, sa iyang bahin, niingon nga sagad sa mga kaso sa iyang lungsod mao ang mga frontliner, nga naglakip sa health care workers nga nagtrabaho sa gawas sa lungsod.

Si Peña nahinumdom nga ang unang kaso nga natala sa lungsod mao ang us aka nurse sa Vicente Sotto Memorial Medical Center (VSMMC).

“Lisod man sad og atong pugngan nga dili nato pabalikon kay ikiha nya ta og discrimination. Mao nay akong problema. Ako bitaw nang gi brought up sa taas didto, pero wa may response pa parte anang pag control ana nila, “ siya niingon.

Mga barangay sa Minglanilla nga duna nay mga kaso sa Covid naglangkob sa Lipata, Tunghaan, Pakigne, Calajo-an, Tubod, Tulay, Ward 1, 2, ug 3, Vito, ug Tungkop.

Matod niya nga usa ka sityo sa Barangay Vito gi-lockdown human ang usa sa mga residente nga nagtrabaho isip electrician sa VSMMC, positibo sa Covid-19. (WBS)


Source: Sun.Star Superbalita (https://www.sunstar.com.ph/article/1861665/Superbalita-Cebu/Balita/2-ka-lungsod-taas-og-kaso-sa-Covid?ref=rss&format=simple&link=link)

No comments