Recent Posts

Breaking News

2 ka kawani sa Kapitolyo namatay; 12 na ka empleyado gi-Covid


DUHA ka mga empleyado gikan sa Cebu Provincial Capitol ang nakabsan sa kinabuhi tungod sa gisuspetsahan nga pagkatakod sa coronavirus disease (covid-19).

Kini maoy gikompirma ni Dr. Christina Gianggo, ang pangu sa Provincial Health Office (PHO) sa Hunyo 27, 2020.

Ang usa mao ang 58 anyos nga babaye nga nagpuyo sa dakbayan sa Sugbo.

Usa kini ka regular employee sa kapitolyo.

Human nga nakasinati ug simtomas, gipaubos kini sa swab test. Nag positibo ang resulta niini apan sa confirmatory test ug base sa records sa Kapitolyo, negatibo ang resulta niini.

Ang ikaduha mao ang 53 anyos nga lalaki nga taga dakbayan sa Sugbo.

Usa kini ka regular nga empleyado ug moabot 30 ka tuig na kining nag trabaho sa Kapitolyo.

Nagpakonsulta kini sa Hunyo 15 tungod sa nasinati nga simtomas. Sa maong higayon, gipaubos siya sa swab test.

Nag positibo ang resulta niini. Una siya nga gipaubos sa Cebu City Quarantine Center ug gi transfer sa Cebu City Medical Center.

Matod ni Dr. Gianggo, hypertensive usab ang maong pasyente.

Sa pagkakaron, gipahigayon na ang contact tracing sa mga nakahimamat sa mga pasyente.

May natala nga 12 na ka mga positibo nga kaso ang Kapitolyo, duha na ang nakarecover ug duha ang namatay. (ANV)


Source: Sun.Star Superbalita (https://www.sunstar.com.ph/article/1861602/Superbalita-Cebu/Balita/2-ka-kawani-sa-Kapitolyo-namatay-12-na-ka-empleyado-gi-Covid?ref=rss&format=simple&link=link)

No comments