Recent Posts

Breaking News

‘Rapist, tulisan’ nga wanted, nadakpan


NADAKPAN sa kapulisan sa lungsod sa Compostela ug Dakbayan sa Lapu-Lapu ang usa ka amahan nga wanted sa giingong paglugos sa iyang anak nga menor ug person with disability pa sa miaging tuig.

Wa na makaipsot pa niadtong Lunes sa gabii, Mayo 4, 2020, si Miguelito (di tinuod niyang ngan), 49, sa mga pulis nga niabot sa iyang gipuy-an sa isla sa Olango, Dakbayan sa Lapu-Lapu.

Si Police Lt. Col. Arturo Brual Jr., pangu sa Regional Intelligence Unit (RIU)-7, nangu sa operasyon kuyog ang mga sakop sa kapulisan sa dakbayan sa Lapu-Lapu ug Compostela Police Station ug Provincial Intelligence Branch (PIB), niingon nga si Miguelito nipuyo sa Barangay Santa Rosa.

Si Miguelito gidakop pinasikad sa warrant of arrest nga gi isyu ni Judge Dalisay Chavez-Ohdate sa Branch 85 Regional Trial Court (RTC) sa Dakbayan sa Mandaue sa kaso nga pagpang lugos nga way girekomendar nga piyansa. Matod ni Brual nga si Miguelito number 1 most wanted sa lalawigan sa Sugbo.

Gawas sa giigong pag-rape, nitumaw sa ilang imbestigasyon nga si Miguelito nalambigit sa mga pagpanulis sa lungsod sa Compostela ug kasikbit nga mga dapit. Temporaryong gibilanggo sa Police Station 1 sa Lapu-Lapu City Police Office si Miguelito. (BBT)


Source: Sun.Star Superbalita (https://www.sunstar.com.ph/article/1855227/Superbalita-Cebu/Balita/Rapist-tulisan-nga-wanted-nadakpan?ref=rss&format=simple&link=link)

No comments