Recent Posts

Breaking News

‘Nanghasi, nanion’ sa control point volunteers gipusil patay


GIPUSIL patay sa Biyernes alas 3 pasado sa hapon, Mayo 8, 2020 sa duha ka mga manag-agaw ang 24 anyos nga lalakeng giingon nga nanghasi ug nanion sa mga volunteer sa control point sa usaka sityo sa Cogon Pardo.

Namatay diha-diha si Robert Oliveros, 24, taga Sityo All Season 1 sa nahisgutang barangay human pusila sa manag-agaw nga giilang sila si Geric Gabuya ug Kakoy Gabuya, taga Sityo Tayud sa mao nga barangay.

Mga saksi sa dapit nisulti sa Superbalita Cebu nga sa wa pa ang hitabo, ang kapuyo ni Oliveros nga si Geraldine Santos, 22, moagi unta sa control point sa All Season 3 mga pasado alas 12 sa udto.

Apan giingon nga wa pasudla si Santos kay wa magpuyo sa dapit hinungdan nga nibalik sa agi ug nisumbong kang Oliveros.

Giingon nga si Oliveros isog nga niadto sa control point ug giingon nga nanghasi samtang nagdala og armas, apan naalam-alaman ra.

Nipauli na unta kini, apan nibalik si Oliveros, giingon nga nanghasi ug nanion na usab sa volunteers.

Giingon nga ang mag-agaw nga mga Gabuya nipalit, nipusil kang Oliveros sa makadaghang mga higayon.

Natusak sa mga bala ang lawas ni Oliveros hinungdan sa pagkamatay diha-diha.

Samtang ang mga suspek wa pa madakpi. (BBT)


Source: Sun.Star Superbalita (https://www.sunstar.com.ph/article/1855613/Superbalita-Cebu/Balita/Nanghasi-nanion-sa-control-point-volunteers-gipusil-patay?ref=rss&format=simple&link=link)

No comments