Recent Posts

Breaking News

Gwen mopahugot sa lakang batok ASF


ANG Cebu Provincial Government mipahugot pa sa iyang mga lakang aron di makasulod ang African Swine Fever (ASF) sa Sugbo pinaagi sa indefinite nga ban sa pagsulod sa buhi nga mga baboy, pork-related nga mga produkto, byproducts ug nasagol nga mga pagkaon gikan sa isla sa Mindanao.

Si Gobernador Gwendolyn Garcia niluwat niadtong Mayo 8 og Executive Order (EO) 16 nga nagdili sa pagsulod sa buhi nga mga baboy, mga produkto niini, byproducts, semen sa butakal nga baboy ug tanang matang sa karne (manok, baka o isda) o bisan unsang produktong pagkaon nga gibutang sa cold storage kauban sa karne sa baboy, pork related o bisan unsang produktong pagkaon nga gikan sa Mindanao.

Miepekto gilayon ang mando.

Ang unang 90 ka adlaw nga ban sa Kagamhanang Probinsyal nga gipatuman niadtong Pebrero 13, mapupos unta karong adlawa, Mayo 11.

Usa sa mga nalatid sa mando, ang EO nagkanayon nga base sa updated nga

National Zoning and Movement Plan matag rehiyon alang sa ASF nga gipetsahan og Abril 24, 2020 sa Bureau of Animal Industry sa Department of Agriculture, ang Davao City, Davao Occidental ug Davao del Sur giila nga infected areas "thereby classifying the entire island of Mindanao as a contaminated zone due to the danger posed by its land mass where different local government units are interconnected by thoroughfares and highways."

Sa wa pa luwati ang EO, si Garcia niingon nga ang Kapitolyo molugway sa ban sa pagsulod sa buhi nga mga baboy, produktong baboy ug byproducts gikan sa Mindanao sa way tino kon kanus-a mapupos o hangtod nga ang Sugbo “conquer the coronavirus disease crisis.”

Ang pahibawo ni Garcia giluwatan human si Cebu City Mayor Edgardo Labella nitugot sa pagsud sa mga baboy gikan sa mga dapit nga wa maapektuhi sa ASF. (RTF)


Source: Sun.Star Superbalita (https://www.sunstar.com.ph/article/1855842/Superbalita-Cebu/Balita/Gwen-mopahugot-sa-lakang-batok-ASF?ref=rss&format=simple&link=link)

No comments