Recent Posts

Breaking News

Barangay kapitan mipakita nga ehemplo sa rapid testing


DIHANG nakita nga nag-ukon-ukon ang mga tawo sa strategic rapid testing, nilinya og una si Virgilio Casiao, barangay kapitan sa Pangan-an sa isla sa Olango, dakbayan sa Lapu-Lapu niadtong Miyerkules, Mayo 6.

Sa katuyoan nga makonbinser niya ang iyang mga konstituswente nga mopaubos sa Covid-19 test ilabi na nga kasagaran nagtulodtulod lakip na ang pipila sa mga barangay opisyal gumikan sa kahadlok nga mopa-ubos sa maong testing.

“Sus, naay nangluspad, kay nahadlok (tuslokon). Usa pud sa ilang gikahadlokan nga kon mo-positive kana laging i-quarantine, mao tong akong gipasabot,” tipik sa pamahayag ni Casiao sa dihang nahinabi sa Superbalita Cebu.

Gisugdan ang rapid testing sa Lapu-Lapu niadtong Miyerkules, Mayo 6, diin giuna ang isla sa Olango sa mga Barangay Caohagan ug Pangan-an nga gidumala sa City Health Office.

Adunay 20 ka tawo mipaubos sa test sa Caohagan samtang 65 sa Pangan-an base sa 10 porsento nga gidagdahon sa populasyon sa usa ka barangay.

“Dili ‘ta ngay mahadlok o mabalaka (on the rapid tests) kay kon ikaw gusto ka nga mabalik ta, sa normal nga kinabuhi, we need your cooperation, we need your support,” maymay ni Mayor Junard Chan nga napatik sa iyang social media address.

Ang siyudad adunay siyam ka team nga mopahigayon sa random test ngadto sa matag balay sa matag barangay ug priority kadtong mga quarantine pass holder.

“Kinasingkasing gyud tang mohangyo nga ikaw may napilian, let's cooperate, this is for our own good,” hangyo ni Chan.

Apan sa kadtong mobalibad ang team mobalhin ngadto sa laing tagbalay, aron mangita og laing indibiduwal nga mokooperar ilabi na nga gikinahanglan nga makuha ang gidaghanon sa quota.

“Gusto na ta mahuman dayon gud (kay) naa tay timetable giapas,” pasabot sa mayor.

Gipahihawo nga karong adlawa maoy schedule alang sa Barangay Marigondon ug Agus, kagahapon, Mayo 7 ang residente sa Barangay Poblacion ug Suba Basbas mao ang gipaubos sa maong rapid testing. (FVQ)


Source: Sun.Star Superbalita (https://www.sunstar.com.ph/article/1855506/Superbalita-Cebu/Balita/Barangay-kapitan-mipakita-nga-ehemplo-sa-rapid-testing?ref=rss&format=simple&link=link)

No comments