Recent Posts

Breaking News

30 ka mangomprahay gikasab-an sa opisyal


GIKASAB-AN sa opisyal sa Cebu City Market Authority (CCMA) atubangan sa mga pulis sa Carbon Market ang 30 ka mga mangomprahay niadtong Miyerkules sa buntag, Mayo 6, tungod sa paglapas sa mga lagda sa merkado.

Ang CCMA mipatuman og mga polisiya sa pagpangompra sukad sa pag-igo sa coronavirus disease (Covid-19) ug gipatuman ang social distancing.

Ang siyudad nagpatuman usab og letter coding sa mga apelyado sa mga mangomprahay.

Matod ni Police Capt. Alvin Llamedo, hepe sa Carbon Police Station, mismo si Market Administrator Junel Matuguinao maoy nangulo sa pagdala sa mga mangomprahahay nga gidakop.

Wa sila pasakai og kaso apan gipangkasab-an ug gipahimangnoan nga sa sunod, prisuhon na sila og pasakaan og kaso.

Kining tungod sa paglapas sa executive order 69 ni Mayor Edgardo Labella nga naglatid sa bag-ong mga polisiya sa pagpaninda ug pagpamalit sa Carbon.

Nabutang sa mando kon unsang orasa mahimong mosulod sa Carbon ug dunay entrance ug exit.

Kining duh aka mga lagda nalapas sa mga mangomprahay.

"Ang angayan mosulod sila alas 3:00 sa kaadlawon apan ang uban misulod sa 1:00 ug alas 2:00 sa kadlawon nakasulod," pagpasabot ni Llamedo.

Matod ni Llamedo nga buksan ang public market alas 3 sa kaadlawon hangtod sa alas 8 sa gabii.

Ang pagpatuman sa mga lagda gitumong aron maminusan ang gidaghanon sa mga manindahay alang sa social distancing ning panahon sa Covid-19. (BBT)


Source: Sun.Star Superbalita (https://www.sunstar.com.ph/article/1855366/Superbalita-Cebu/Balita/30-ka-mangomprahay-gikasab-an-sa-opisyal?ref=rss&format=simple&link=link)

No comments