Recent Posts

Breaking News

Kapitolyo, PB mohatag og pinansyal nga ayuda

GIGAHINAN og P4 milyones sa Hunta Probinsyal ang matag sakop niini aron ipalit og bugas nga ihinabang sa ilang mga konstituente matag distrito.

Kini maoy gipahibaw ni Gobernador Gwendolyn Garcia atol sa regular nga press conference sa Abril 1, 2020.

Ang pundo gikan sa Legislative Assistance Fund (LAF). Dunay 14 ka mga sakop ang Provincial Board, way labot ang mga ex-officio member niini.

Madugang kini sa laing hinabang nga ihatag sa Kapitolyo nga gipahibawo ni Garcia niadtong Martes.

Moabot sa P10 milyones ang LAF sa matag bokal sa probinsya human gipun-an ni Garcia sa iyang pag asumer.

Ang gigahin nga pundo sa mga bokal ipalit gihapon og bugas nga ipang apud-apod sa mga konstituente nga nakasinati sa krisis tungod sa coronavirus disease (Covid-19).

“Ang sa pito ka distrito ug lakip na ang atong ex-officio nga mga board members nigahin sa ilang legislative funds. Nihangyo sila nga part of it magamit alang sa pagpalit og bugas aron ila usab maapod apod sa ilang respective districts”, matod ni Garcia sa mga tigbalita.

Matod ni Garcia nga may supplier na sila nga nahinabi nga mo supply og imported nga bugas gikan sa Vietnam.

Matag sako sa bugas mokantidad og P1, 850. Kon paliton kini matag kilo, mokantidad kini og P38 ngadto sa P50.

Samtang alang sa ayuda usab nga madawat sa matag lungsod, may gihatag nga lista ang Lalawigan nga maoy pamaliton alang sa mga labing nagkinahanglan.

Kini sama sa bugas humay, bugas mais, sardinas, powdered milk, kape, instant noodles, mantika, asin, kamay, detergent ug bleach subay sa presyo nga gihatag sa Department of Trade and Industry (DTI).

“Unahon gyud to nato ang wa nay kapaingnan, ang mga kabus, ang katong wa nay mga trabaho, mga senior citizens nga walay means of income, katong mga naka quarantina nga wala na sad makatrabaho mao nay atong iuna. Og naa man gani sobra, then ato ipuno sa ubang mga households”, matod ni Garcia.

Ang sister province usab sa lalawigan sa Sugbo nga mao ang Guangxi sa nasud sa China gikatakda nga mohatag og mga Personal Protective Equipment (PPE) nga magamit sa mga frontliners sa Sugbo.

Samtang moapud-apod ang Kagamhanan sa Lalawigan sa Sugbo og pinansyal nga ayuda sa 44 ka mga lungsod ug pito ka mga dakbayan sa lalawigan alang sa pagpalit og rasyon.

Si Garcia nagkanayon nga ang pinansyal nga ayuda magdepende sa income class ug sa gidaghanon sa mga konstituente sa usa ka local government unit (LGU).

Atol sa pakighinabi sa mga tigbalita sa Marso 31, 2020, gipahibaw ni Garcia nga may inisyal nga P376 milyones nga budget ang giandam karon sa lalawigan nga kuhaon gikan sa pondo sa assistance to LGU.

Source: Sun.Star Superbalita (https://www.sunstar.com.ph/article/1850946/Superbalita-Cebu/Balita/Kapitolyo-PB-mohatag-og-pinansyal-nga-ayuda?ref=rss&format=simple&link=link)

No comments