Recent Posts

Breaking News

Dugang ECQ pass giimprinta sa City Hall

ANG Cebu City Government mo-imprinta og dugang Quarantine Pass isip dugang sa 250,000 ka mga enhanced community quarantine passes nga ilang unang nahatag sa 80 ka mga barangay.

Kini ang gipahibawo ni Mayor Edgardo Labella human iyang nahibaw-an nga aduna pay mga panimalay kansang representante sa pamilya wala pa makadawat ug di makagawas para pagpalit sa ilang mga kinahanglanon.

Ang mayor wa pa mobutyag kon pila ka mga ECQ pass ang ilang idugang sa 250,000 nga matod pa niya gisugdan na og printa kagahapon, Miyerkules, Abril 1, 2020. Si City Administrator Floro Casas Jr., nagkanayon nga ang maong mga ECQ Pass maoy gamiton pagpanghatag ngadto sa barangay kinsa nagkuwang sa ilang mga pass.

Ang alter ego ni Labella nibutyag nga anaa na sa 80 porsiyento sa 250,000 ka mga ECQ ang nakumpleto sa 80 ka barangay sa dakbayan. Ang mayor nidugang nga kadtong wa pay mga ECQ pass apan adunay mga quarantine pass nga giisyu sa ilang barangay, mahimo nilang gamiton paggawas sa ilang tagsatagsa ka pinuy-anan, apan kutob ra kini sa lugar nga sakop sa ilang hurisdiksyon. (PAC)

Source: Sun.Star Superbalita (https://www.sunstar.com.ph/article/1850947/Superbalita-Cebu/Balita/Dugang-ECQ-pass-giimprinta-sa-City-Hall?ref=rss&format=simple&link=link)

No comments